«یحیی شیدا»نین ژورنالیسم عنعنه‌سی

«یحیی شیدا»نین ژورنالیسم عنعنه‌سی

روشن نوروزی / مسئول مدیر – اون ایل بوندان اول، استاد «یحیی شیدا»نین گؤروشونه گئتدیم. او گون‌لر‌ده آذربایجانین معاصر ادبی-مدنی‌سیما‌لاریندان شکیل چکیردیم. تبریزه چاتدیقدا بیر باش آذربایجانین تانینمیش شاعر و چوخ سئویلن شخصی «سلیمان ثالث»‌ین ائوینه گئتدیم. مقصدیمی اونون‌لا آرایا قویدوم و ایلک اؤنجه استاد شیدانی گؤرمه‌ییمی اوندان خاهیش ائتدیم. سلیمان عمی استادلا قرارلاشیب و منیم اونون‌لا گؤروشومه شرایط یاراتدی.

استاد شیدانین ائوینه گئتدیک. او گون‌لر استاد ایستر قوجالیق‌دان، ایسترسه ده خسته‌لیک سببیندن یاتاغا دوشموشدو و بوتون گون‌لرینی اؤز ائوینده یورغان دؤشک‌ده کئچیریردی. بیزی گؤردوکده، چلیگی‌نین کؤمگی ایله یئریندن قالخیب، گولر اوزله خوش گلدین دئییب، سلیمان عمی‌له کئف-احواللاشدی. سلیمان عمی منیم کیم اولدوغومو و نه اوچون تبریزه گلدیگیمی دئیه‌ندن سونرا، منی ده گولر اوزله و تشویق ائدیجی خوش سؤزلرله قارشیلادی. بیر نئچه فریم شکیل چکدیم. کامئرانین کادریندا «مصدق»ین پُرتره‌لرینه اوخشاییردی؛ آنجاق من استاددان باشقا بیر فیگور و باشقا بیر سیما گؤسترمک ایسته‌ییردیم.

آیریلماق واختی گلیب چاتدی. اؤز ممنونیتیمی استادا بیلدیریب، آیریلدیم. ائوین چیخیشیندا باشماق‌لاریمی گئیرکن، استادی اتاقی‌نین پنجره‌سی‌نین کادریندا گؤردوم؛ بیزی یولا سالماق ایسته‌ییردی. کامئرانی گؤتوروب بو کادردا شکیلینی چکدیم.

اوشاقلیق تفریح‌لریمین بیری، جلدینده شطرنج صحیفه‌سی چکیلمیش بؤیوک بیر گالینگور کتابین اوستونده شطرنج مؤهره‌لرینی دیغیرلاتماق ایدی. مدرسه‌یه گئد‌ندن سونرا، او بؤیوک گالینگور کتابین «فروغ آزادی» روزنامه‌سی‌نین «آذری‌صحیفه‌سی» آرشیوی اولدوغونو آنلادیم. بو صحیفه استاد یحیی شیدانین انقلاب‌دان سونرا هر گون حاضیرلادیغی آذربایجان ادبی نمونه‌لر مجموعه‌سی ایدی. عمومیتله ده انقلاب‌دان سونرا آذربایجان ادبیاتینا یئنی اوز گتیرمیش‌لرین، خصوصیله‌ده گنج‌لرین اثرلری ایدی. استاد شیدانین بو صحیفه‌‌نین بؤیوک بیر حیصه‌سینی گنج‌لره آییرماغی اونون اوزاق گؤرنلیگیندن ایمیش؛ نییه کی سونرالار او ادبیات عالمینده ایلک آددیم‌لارینی آتان گنج‌لر، قلم صاحب‌لری و آد قازانمیش ادبی شخصیت‌لر سوییه‌سینه یوکسلدیلر. بلکه ده منیم ژورنالیسمله ماراقلاندیغیمین اساس سبب‌لری‌نین بیری،‌ ائله اوزَرینده شطرنج صحیفه‌سی چکیلمیش او بؤیوک کتاب اولموشدور.

استاد یحیی شیدا، آذربایجان ادبیات و مدنیتی‌نین چیچکلنمه‌سینی ژورنالیسم فعالیت‌لرینده تعریفلمیشدی. او بو‌ میدانی گنج‌لره بوراخدی؛ اونلارین قایغیسینی چکیب، اللریندن توتدو؛ نادر الهی، حاجی هریزلی، فریبا ابراهیمی آفاق، سوسن نواده‌رضی، ائلدار موغانلی، ع. چاپار، میرحسین ریاحی‌فر، یانار اردبیلی، بهروز ایمانی (یاور)، سئل‌اوغلو، منوچهر جوانشیر (گونتای)، بهروز صدیق، همت شهبازی، کیان خیاو، محرم پریزاد و بیر چوخ او دؤورون گنج و یئنی‌یئتمه‌لری ایلک اثرلرینی دؤنه- دؤنه استاد شیدانین «آذری صحیفه‌سی»نده یایماغا امکان تاپدیلار.

«ایشیق» درگیسی ده بوگونکو آذربایجانین اجتماعی، مدنی و ادبی دوروموایله ماراقلانان بیر ‌سیرا گنج‌لرین تشبثی ایله یاییلماغا باشلاییب‌دیر. بو یولدا مدنیتیمیزین کئشیگینده دوران دوننکی گنج‌لرین گؤستریش‌لرینه و امکداشلیق‌لارینا احتیاج دویاجاقدیر. «ایشیق» درگیسی بوگونکی آذربایجانین اجتماعی و مدنی دورومونو عکس ائتدیرن مئدیا اولماغا چالیشاجاق‌دیر؛ عینی حالدا مطبوعاتیمیزین چیچکلنمه‌سی اوغروندا، مضمون اعتباریله استاد شیدانین ژورنالیسم عنعنه‌سینه و فرم باخیمیندان پنجره کادریندان چکیلن بیر پرتره‌یه صادق و وفالی قالاجاقدیر.

«ایشیق» درگیسی اؤنه آددیملاماغا چالیشاجاق‌دیر؛ دورغونلوقدان اوزاق، ایشیقلیغا دوغرو گئده‌ن هر بیر کیمسه‌نین یول یولداشی اولاجاقدیر و اونا اوزانان هر بیر امکداشلیق الینی صمیمیتله‌سیخاجاقدیر.

استاد یحیی شیدا | عکس: روشن نوروزی